Kristín Helgadóttir fæddist að Hvarfi, Víðidal, V-Hún. 20.11. 1921. Hún lést á hjúkrunarheimilinu Víðihlíð, Grindavík, 2.3. 2009. Kristín ólst upp í Víðidalnum. Hún missti föður sinn úr berklum, tæplega níu ára gömul og var henni og Helgu systur hennar komið fyrir hjá vinum og vandamönnum yfir vetrartímann, en á sumrin voru þær heima í Hvarfi, hjá móður sinni. Kristín var mest í Þórukoti hjá Þórði Líndal og Guðnýju Benediktsdóttur (bróðurdóttur Hansínu). Tíu ára hóf hún skólagöngu í farskóla. Eftir fermingu fór hún að vinna við barnagæslu í sveitinni en síðar í vinnumennsku bæði á Norður- og Suðurlandi. Hjá Birni á Löngumýri var hún í þrjú ár og þar kynntist hún manni sínum, Hjálmari. Hún fór á Kvennaskólann á Blönduósi árið 1942-3. Haustið 1943 hófu þau Hjálmar sambúð í Garðabæ. Síðar fóru þau að Eyri við Ingólfsfjörð og unnu við síldarverksmiðjuna. Í maí 1944 hófust þau handa við byggingu Lágafells á Blönduósi, þar sem þau bjuggu í 23 ár. Þar ólu þau upp börn sín, en móðir Kristínar og amma bjuggu hjá þeim um tíma. 1969 fluttu þau í nýtt hús, að Brekkubyggð 12, sem þau byggðu einnig. Kristín vann á Hótel Blönduósi lengst af. Árið 1991 fluttu þau hjón til Keflavíkur. Kristín eyddi síðustu ævidögum sínum á hjúkrunarheimilinu Víðihlíð í Grindavík þar sem hún lést.
Útför Kristínar fer fram frá Fossvogskirkju í dag, 17. mars, kl. 13.