Einstaklingur

Sigurjón Lárusson Rist (1917-1994) vatnamælingamaður

29.8.1917 - 15.10.1994

Sigurjón Rist, vatnamælingamaður, fæddist á Akureyri 29. ágúst 1917. Hann lést í Reykjavík 15. október síðastliðinn. Sigurjón var sæmdur heiðursmerki Jöklarannsóknafélags Íslands 1970, riddarakrossi íslensku fálkaorðunnar 1986 og heiðursmerki Verkfræðingafélags Íslands 1990.
Útför Sigurjóns verður frá Dómkirkjunni í Reykjavík í dag.

Akureyri:

Sigurjón lauk stúdentsprófi frá Menntaskólanum á Akureyri 1938, stundaði nám í heimspeki og haffræði við Kaupmannahafnarháskóla 1938-39, en hvarf heim frá námi vegna stríðsins. Árin 1948-49 stundaði hann nám í vatnafræði hjá Norges Vassdragsvesen og árið 1966 hjá Geological Survey í Bandaríkjunum.

Hann var umsjónarmaður með síldveiðiskipum og síldarsöltun hjá Nirði hf. á Akureyri og Siglufirði 1938-41. Árin 1942-46 rak hann bifreiðaviðgerðaverkstæði hjá KEA og Mjölni hf. á Akureyri. Sigurjón var forstöðumaður vatnamælinga á vegum raforkumálastjóra frá 1947 og Orkustofnunar frá 1967 til 1987. Hann annaðist dýptarmælingar stöðuvatna og kom á kerfisbundnum vatnsrennslismælingum og sá um útgáfu árlegra rennslisskýrslna. Hann var í stjórn Ferðafélags Akureyrar um skeið og formaður þess 1946-47. Þá var hann um langt árabil í stjórn Jöklarannsóknafélags Íslands allt frá stofnun þess 1950 og formaður þess um skeið. Formaður Vatnafræðifélags Íslands frá 1979-1985. Vann í frístundum með sjálfboðaliðum að lagningu bifreiðaslóða um hálendi Íslands á árunum 1940-46, einkum upp úr Eyjafirði, um Sprengisand og Ódáðahraun. Hann var þátttakandi í fransk-íslenska Vatnajökulsleiðangrinum 1951.

Eftir Sigurjón liggja ýmis rit og tímaritsgreinar um vötn og vatnamælingar meðal annars: Íslensk vötn, útg. 1956, og Vatns er þörf, útg. 1990.
Hermann Sveinbjörnsson skráði æviminningar Sigurjóns í bókinni "Vadd'út í", útg. 1989.

Foreldrar hans voru hjónin Margrét Sigurjónsdóttir, f. 1888, d. 1921, húsmóðir á Akureyri, og Lárus J. Rist, f. 1879, d. 1964, sund- og fimleikakennari á Akureyri og síðar í Hveragerði. Eftir lát móður sinnar var Sigurjón sendur í fóstur til hjónanna Sigtryggs Jóhannessonar, f. 1875, d. 1965, og Jónínu Rannveigar Sigurjónsdóttur, f. 1877, d. 1964, á Torfum í Eyjafirði. Systkini Sigurjóns voru 1) Óttar, f. 1912, d. 1932, 2) Anna, f. 1914, 3) Jóhann, vélstjóri, f. 1916, d. 1951, 4) Regína, f. 1919, 5) Ingibjörg, f. 1920, 6) Páll, f. 1921, fv. lögregluþjónn á Akureyri.
Eftirlifandi eiginkonu sinni, Maríu Sigurðardóttur, viðskiptafræðingi, kvæntist hann 2. ágúst 1962.
Dætur þeirra:
1) Rannveig, f. 9. maí 1961, verkfræðingur, deildarstjóri hjá ÍSAL, gift Jóni Heiðari Ríkharðssyni, f. 9. apríl 1961, verkfræðingi. Dætur þeirra eru Guðbjörg Rist Jónsdóttir, f. 22. júlí 1989, og María Rist Jónsdóttir, f. 25. febrúar 1993.
2) Bergljót, f. 28. febrúar 1966, við nám í dýralækningum í Danmörku.

Lárus Rist (1879-1964) íþróttakennari Ak (19.8.1879 - 9.10.1964)

Margrét Sigurjónsdóttir (1888-1921) Akureyri (20.7.1888 - 5.8.1921)

Regína Lárusdóttir Rist (1919-2008) fótsnyrtifræðingur Reykjavík (7.2.1919 - 28.4.2008)

Anna Lárusdóttir Rist (1914-1999) Akureyri (19.3.1914 -9.3.1999)

Óttar Lárusson Rist (1912-1932) Akureyri (20.7.1912 - 3.4.1932)

Jóhann Rist (1916-1951) Reykjavík (19.3.1916 - 12.4.1951)

HAH01964

IS HAH

Loka

Fullt

GPJ 23.7.2017

• íslenska

®GPJ ættfræði 7.11.2022
mbl 25.10.1994. https://www.mbl.is/greinasafn/grein/160527/?item_num=9&searchid=df1f00d8a03f8cab8e49c8f8be55cd7077e7b20e
Íslendingabók