Brynjólfur Sveinbergsson (1934-2016) mjólkursamlagsstjóri Hvammstanga

• Brynjólfur Sveinbergsson

Brynjólfur Sveinbergsson 17. janúar 1934 - 25. maí 2016. Mjólkurfræðingur og mjólkursamlagsstjóri á Hvammstanga. Gegndi margvíslegum félags- og trúnaðarstörfum.
Brynjólfur fæddist á Blönduósi 17. janúar 1934. Hann lést á sjúkrahúsinu á Hvammstanga 25. maí 2016.
Útför Brynjólfs fór fram frá Hvammstangakirkju 3. júní 2016, og hófst athöfnin kl. 14.

Blönduós; Selfoss; Hvammstangi:

Búfræðingur frá Hólum 1952, útskrifaðist sem mjólkurfræðingur frá Statens Meieriskole í Þrándheimi í Noregi í lok árs 1955 og varð meistari í mjólkuriðn 1959.

Brynjólfur ólst upp á Blönduósi og dvaldi fjölmörg sumur í sveit í Stóradal í Svínavatnshreppi. Fjórtán ára gamall hóf hann störf í Mjólkursamlaginu Blönduósi, varð búfræðingur frá Hólum 1952, útskrifaðist sem mjólkurfræðingur frá Statens Meieriskole í Þrándheimi í Noregi í lok árs 1955 og varð meistari í mjólkuriðn 1959. Brynjólfur starfaði alla tíð við iðn sína, fyrst í Mjólkurbúi Flóamanna á árunum 1956-58 og síðar sem mjólkursamlagsstjóri á Hvammstanga í fjörutíu ár frá 1959-1999. Brynjólfur var mikill Hvammstangabúi og bærinn og sveitirnar í kring skiptu hann miklu máli. Hann fór árum saman í göngur inn á Víðidalstunguheiði auk þess að sækja á fjöll og fram á heiðar í frítíma sínum.
Brynjólfur var öflugur í félagsstörfum, sat í stjórn Mjólkurfræðingafélags Íslands, Tæknifélags Mjólkuriðnaðarins, Fjórðungssambands Norðlendinga, Rannsóknarstofu mjólkuriðnaðarins, Samtaka afurðastöðva í mjólkuriðnaði og var einn af stofnendum Lionsklúbbsins Bjarma þar sem hann var formaður og sat í nánast öllum nefndum. Hann var oddviti og sat í hreppsnefnd Hvammstangahrepps árum saman auk setu í nefndum. Hann vann einnig að því að hitaveita var lögð til Hvammstanga 1972. Hann var formaður sóknarnefndar Hvammstangasóknar um tíma. Brynjólfur var framsóknarmaður, sat í stjórn kjördæmissambandsins og var varaþingmaður auk fleiri trúnaðarstarfa. Hann stofnaði ásamt öðrum Sauma- og prjónastofuna Drífu, útgerðarfélagið Meleyri og hlutafélagið Eyri.

Brynjólfur var sonur hjónanna Guðlaugar Nikódemusardóttur frá Sauðárkróki, f. 30.10. 1914, d. 12.6. 2001, og Sveinbergs Jónssonar, bifreiðastjóra frá Stóradal í Austur-Húnavatnssýslu, f. 6.7. 1910, d. 19.11. 1977.
Albræður Brynjólfs:
1) Jón Sveinberg, f. 1936.
2) Grétar, f. 1938, d. 1992.
Systkin samfeðra:
3) Birgir, f. 1941.
4) Þórey, f. 1942.
5) Gísli, f. 1944.
6) Margrét, f. 1945.
7) Sigurgeir, f. 1951.
8) Lára f. 1956, d. 2015.
Systkini sammæðra:
9) Karl, f. 1943.
10) Þorleifur, f. 1945, d. 1991,
11) Ingibjörg, f. 1946.
12) Valgerður, f. 1948, d. 1994.
13) Jón, f. 1949.
14) Sveinn, f. 1951.
15) Haraldur, f. 1953.
16) Ari, f. 1954, d. 2009.
17) Guðrún, f. 1956.
18) Anna Helga, f. 1960.
Stjúpmóðir Brynjólfs var Lára Guðmundsdóttir frá Sólheimum í Austur-Húnavatnssýslu, f. 4.8. 1912, d. 5.10. 1997.
Dóttir hennar er
19) Sjöfn Ingólfsdóttir, f. 1939.
Þann 17.1. 1960 kvæntist Brynjólfur Brynju Bjarnadóttur, f. 3.10. 1942. Brynja er dóttir hjónanna Þórhildar Hannesdóttur og Bjarna Ásbjörnssonar.
Börn þeirra:
1) Sveinbjörg, f. 31.8. 1962, eiginmaður hennar er Örn Gylfason og dóttir þeirra Brynja.
2) Bjarni Ragnar, f. 29.2. 1964, eiginkona hans er Erla Guðrún Magnúsdóttir og börn þeirra Viggó Snær, Kári Sveinberg og Berglind.
3) Hrafnhildur, f. 5.6. 1970, maður hennar Hrafn Margeirsson og börn þeirra Örn, Margeir, Eldey, Hekla og Katla.

GPJ 23.1.2018

• Icelandic

®GPJ ættfræði https://www.mbl.is/greinasafn/grein/1598116/?item_num=0&searchid=bc86a6ea33c7a7f6cfb13391e70e44ef0583583b&t=160690017&_t=1515925736.01
Mbl 3.6.2016