Series D - Ljósmyndir

Guðbjartur ólst upp í Tálknafirði, hann fór á sjóinn og vann við almenn sveitarstörf. Árið 1959 fór hann til náms á Hvanneyri, Akranesi og Akureyri og útskrifaðist frá Hvanneyri sem búfræðikandídat árið 1965.
Árið 1965 fluttu hann og Margrét á Blönduós og starfaði hann þar sem ráðunautur hjá Búnaðarsambandi Austur-Húnvetninga í yfir fjörutíu ár ásamt því að starfa við Ræktunarsamband Austur-Húnvetninga.
Guðbjartur var mikill félagsmálamaður, hafði mikinn áhuga á íþróttum, spilaði bridge og var ötull stuðningsmaður Umf. Hvatar og heiðursfélagi í Ungmennasambandi Austur-Húnvetninga. Hann var virkur félagi í Lions í yfir fjörutíu ár og starfaði mikið að bæjarmálum og var virkur þátttakandi í Framsóknarflokknum.
Útför Guðbjarts fór fram frá Blönduóskirkju 24. janúar 2015, og hófst útförin kl. 14.