Nám og störf Hauks og Rúnu erlendis báru smám saman ríkulegan ávöxt, ekki einungis í keramikinu, heldur einnig málverkinu. Keilir blasti við eins og glögglega má merkja í myndum Hauks fyrr og síðar. Rúna sló ekki slöku við, fremur en áður. Hún stofnaði ... »
Nám og störf Hauks og Rúnu erlendis báru smám saman ríkulegan ávöxt, ekki einungis í keramikinu, heldur einnig málverkinu. Keilir blasti við eins og glögglega má merkja í myndum Hauks fyrr og síðar. Rúna sló ekki slöku við, fremur en áður. Hún stofnaði listmunaverslunina Kúnígúnd við Skólavörðustíg ásamt vinkonu sinni, Guðrúnu Magnúsdóttur, Dúnu, fljótlega eftir heimkomuna. Það var glæsibúð með nýjum stíl sem snerti listræna strengi breyttra tíma. Þar voru alþekktu kertin hennar Rúnu - Norðurljós hétu þau - sem hún framleiddi árum saman af mikilli smekkvísi og runnu út. Verslunarrekstur, kertagerð, leirmunagerð; þótt ekkert af þessu væri í sjálfu sér nýlunda á Íslandi voru stíll og efnistök með nýjum brag. Að því leyti fóru þar frumkvöðlar.
Stórhuga fólk unir ekki lengur þegar allt virðist vera að færast í fastar skorður. Þá þarf að kanna nýjar slóðir, hugurinn leitast við að storka örlögunum og sé kjarkurinn nægur er látið til skarar skríða. Hauk og Rúnu skorti ekki hugrekkið, seldu allt hér heima 1980 og settu stefnuna á Ameríku til að byrja með. Þá tók við tveggja ára dvöl í Columbia í Maryland, nýtt hús og nýr leirbrennsluofn og mikið varð til af fallegum hlutum. Þar nutu þau öll dyggilegrar aðstoðar Dóru, systur Hauks.
Og ögrandi hugmyndir voru til þess eins fallnar að koma þeim í verk; þau rétt tylltu niður fæti á gamla landinu á leiðinni austur um haf á ný, söðluðu gjörsamlega um, festu kaup á gömlum og lúnum herragarði á Norður-Sjálandi og umbyltu enn sem fyrr gömlu húsi, og þar með lífi sínu, svo ævintýri var líkast. Á ótrúlega skömmum tíma varð að veruleika glæsilegur veitingastaður, Tinggården, þar sem gestum var boðið hangikjöt og íslenskar pönnukökur meðal annarra kræsinga. Og líkaði vel. Haukur og Rúna stóðu í eldlínunni, við potta og pönnur og uppvaskið - Tinna og Tanja líka - innkaupin, bókhaldið, starfsmannahaldið og allt sem fylgir veitingaamstri. En erill og fjárhagsvíl varð meira en góðu hófu gegndi og fjölskyldan flutti sig um set inn til Kaupmannahafnar.
Rúna helgaði sig upp frá því fyrst og fremst Hauki, Haukur helgaði sig Rúnu og myndlistinni, og þau bæði dætrunum. Rúna hafði þó engu gleymt um verslunarrekstur með listmuni og stofnaði með vinahjónum, Mörtu Kristjánsdóttur og Guðjóni Gestssyni, Gallerí Grímu við Laugaveg fyrir tæpum tveimur árum. Annaðist hún innkaup í Danmörku af þeirri list sem galleríið ber með sér. Marta og Guðjón reyndust síðan, að öðrum ólöstuðum, meðal sannra vina í raun.
«
